Pemkot Surabaya Sajak Ngati-ati
Gedhong Balai Pemuda Surabaya sing nate kobong, nganti saiki pembangunane durung rampung
Pemerintah Kota (Pemkot) Surabaya sajak ngati-ati banget anggone nerusake pembangunan Balai Pemuda tahap kapindho kang dijatah dhuwit Rp 5 miliar iku. Proyek tahap kapindho kasebut nglimputi pembangunan rerenggan njero bangunan (interior) lan tambahan cungkup ndhuwur wuwung. Pemkot duwe alesan emoh nuwuhake protes saka masyarakat gara-garane pembangunan gedhong ora padha persis karo gedhong sing lawas.
Kepala Dinas Cipta Karya dan Tata Ruang (DCKTR) Surabaya Agus Imam Sonhaji ngandhakake, saiki pehake lagi ngrampungake desain (gambar) interior gedhong Balai Pemuda kang kobong dhek sawatara taun kepungkur. Ngrampungake desain iku dudu perkara kang gampang. Awit, desain iku kudu temen-temen slaras karo wujud asline. Klebu bahan kang arep dipasang ing interior gedhong.
Manut alumnus ITS Surabaya kasebut, sasuwene iki referensi (buku pituduh) gegayutan karo detail (perangan sing cilik-cilik) gedhong sejarah iki sethithik banget.
“Mulane, aku kabeh kudu ngakeh-akehake nganakake konsultasi karo sakehing ahli lan Balai Pelestarian Peninggalan Purbakala (BP3) Trowulan. “Rampung sethithik wae dakkonsultasekake,” ujare.
Nerusake proyek Balai Pemuda, tandhese Agus Imam Sonhaji, uga dudu barang sing gampang. “Mbleset sethithik wae, aku kabeh diprotes masyarakat. Mesthi umyeg. Mula saka iku, aku pilih ngati-ati banget. Ora ateges ora digarap,” kandhane.
Agus duwe pangira-ira yen lelang proyek kasebut nembe diwiwiti suk sasi Mei iki. Jadwal iku klebu rendhet yen ditandhingake karo proyek fisik liyane sing adate dianakake ing sasi Januari, Pebruari, lan Maret. Sanajan mangkono, Agus percaya proyek kasebut bakal rampung ing pungkasan taun iki.
Wis samesthine Pemkot Surabaya was sumelang. Sebab, nalika kurange cungkup telu ing konstruksi wuwung Balai Pemuda wae, langsung nuwuhake sakehing protes. Malah, sakehing pehak kang peduli marang gedhong cagar budaya klakon nglapurake perkara iki menyang kejaksaan.
Nanging, Ketua Komisi C DPRD Surabaya Sachiroel Alim Anwar ngandhakake ora percaya klawan target kang wis ditetepake dening Pemkot kasebut. Dheweke nganggep jadwal iku cukup rendhet.
Manut Sachiroel, nutugake pembanguna gedhong, klebu desain interiore, mesthine wis dirampungake Pemkot pungkasan taun kepungkur. “Yen Mei digarap, aku wani totohan mesthi bakal molor maneh kaya proyek pembangunan payon biyen,” tandhese politikus Partai Demoktar kasebut.
Sachiroel nambahake maneh, yen Pemkot kuwatir dikomplin masyarakat, ana becike rekanan kang ditetepake kudu temen-temen duwe pengalaman ndandani bali cagar budaya. Upamane, rekanan kang nate nggarap gedhong Wismilak utawa House of Sampoerna. Dheweke yakin ndandani bali gedhong cagar budaya uga akeh dumadi ing Indonesia. “Nanging, Pemkot kudu waspada marang bab iki. Aja nganti bab-bab kaya iki salah anggone milih rekanan, sing akhire bisa mbubrahi tatanan,” tandhese. (Bsh)
Pedagang Pasar Turi; Investor Nyulayani Janji
Spandhug sing isine protes marang pembangunan Pasar Turi dipasang ing posko Tempat Penampungan Sementara Rasa pegele pedagang Pasar Turi
Mbangun Underpass Kanggo Ngudhari Kemacetan
Salah siji pojok dalan Mayjen Sungkono kang arep digawekake underpass Kemacetan ruwet nggremet ing Jalan Mayjen Sungkono antuk tanggap
Lingkar Timur Dikuwasani Pengembang Ngawur
Lemah kanggo pembangunan Jalan Lingkar Luar Timur (JLLT) wis akeh kang dikuwasani dening pengembang16 Lemah kang bakal digunakake kanggo
