Tumbal Kaculikan (1)
Cerita Rakyat - Posted by admin on July 5, 2012
Wayah esuk langite su milak, ngrenggani desa Jenar Lor. Desa cilik sing dununge mung sawetara dohe saka samodra kidul. Saengga senajan lagi wektu esuk, nanging hawane wis krasa panas.
Nalika kuwi ngepasi dina Kemis Wage, sasi Sapar, lumebu ing petungan taun kawolulas mungguh etungan dina, sasi lan taun yasane Kanjeng Sultan Agung Hanyakrakusuma. Jalaran nalika Sultan Agung kang ngasta bawat pusaraning adil, kejaba grengseng lan mempeng anggone lumawan bangsa Landa, panjenengane uga yasa petungan taun lan pranata mangsa kang luwih njawani. Satemah jeneng dina, pasaran, sasi lan taun sing sakawit ngemu tembung Sansekreta, banjur diganti pocapan utawa tembung Jawa. Sadurunge ana petungan yasane Sultan Agung, dina Kemis Wage iku sakawit aran Respati Cemengan, utawa Respati Kresnha.
Lan merga piwulang yasane Sultan Agung, ing bebrayan Jawa tuwuh padatan nyekar ing pasareyan-pasareyan. Mangkono uga sing dumadi ing desa Jenar Lor. Wong-wong padha ndlidir merlokake tuku kembang lan uba rampe ing pasar desa Jenar Wetan. Desa Jenar iku cacahe ana telu. Yaiku Jenar Lor, Jenar Wetan lan Jenar Kidul. Dene kang minangka dadi watesing desa tetelune mau mung dalan protelon. Sawetan dalan Jenar Wetan, sing sakulon lor dalan Jenar Lor. Mungguh kang mapan ing sakulon kidul dalan iku Jenar Kidul.
Saka telung desa iku, sing ana pasare mung Jenar Wetan. Mula swasanane ajeg rame jalaran dadi papan kanggo dol tinukune para warga saka telung desa. Malah yen pinuju dina pasaran, yaiku saben dina Selasa, Jemuah lan Ahad pasar Jenar Wetan rame banget. Karana sing padha teka saperlu dol tinuku ora mung para warga saka telung desa wae nanging lanjan saka desa-ngadesa.
Plag, plag, plag, Srimastuti jengkel banget diuneni mangkono, mula tanpa taha-taha dheweke banjur napuki pipine priya ing ngarepe
Anehe ing kahanan regeng kaya ngono nanging kang dirasakake Srimastuti malah kesepen. Jalaran saben nyumurupi wong-wong kang padha nyekar ing kuburan, dheweke banjur kaya diosikake marang lelakon ing wektu telung lapan kang wis kawuri.
Rikala semana dheweke uga pinuju nyekar karo Ratmono ing pesareyane Nyi Kaminten, embah buyute putri ing kuburan Jenar Lor. Dumadakan kalane dheweke lan Ratmono kekasihe iku lagi ngunjukake donga kanggo ndongakake sing sumare, keprungu jumledhore bedhil kaping telu nuli kasusul panguwuh sing ngagetake.
“Hayo Ratmono! Kowe pilih pasrah tak rangket apa suwala nanging modar dening bedhilku iki?!” Terus pating bedhengus sawetara Kumpeni Landa kang dikinthil dening Rusdanto.
Kepeksa Ratmono lan Srimastuti nglereni anggone kirim donga, banjur gumregah ngadhepi sing nembe teka lan ngreridhu.
“Lho, kowe kok malah nggamblok Kumpeni, Dan?!” aloke Ratmono nlesih Rusdanto.
“Critane dawa Rat, nanging yen kowe pengin slamet lan mulya uripmu kaya aku, becike nggamblok wae karo Kumpeni”, Rusdanto mangsuli sajak tanpa sanggan, kepara malah katon mongkog.
Ratmono mungkat bruwalaning atine. Mula tanpa taha taha wut…! Kamplengane Ratmono meh namper uwange Rusdanto yen ………
