Yesus Miyos Pindha Menungsa Papa

D h a n d h a n g g u l a

 

1.  Betlehem ing wanci tengah ratri

Para pangon anèng ara-ara

Samya anjagi kéwané

Kagyat dupi andulu

Ana lintang padhang nelahi

Sumorot ingkang cahya

Sajak ngajak iku

Para pangon datan krasa

Ngiring sang kartika nuju kandhang sapi

Nyeksèni sang Pamarta

 

2.  Para pangon kabèh anut sami

Lintang ageng amadhangi marga

Ginarebeg ing swarané

Rerepén kang keprungu

Malaikat angidung sami

Binarung swara ménda

Ingkang sami anut

Kadi suka pari suka

Abyor lintang-lintang padhang anèng langit

Mahargya miyosira

3.  Yesus miyos anèng kandhang sapi

Pindha manungsa papa sangsara

Papan dunung datan duwé

Lamun imané kukuh

Allah mesthi badhé maringi

Tata tentrem raharja

Lan sedayanipun

Maryam datan campur priya

Mudha Yusuf ingkang kedah angampingi

Malékat dhawuhira

 

4.  Makaten kapethik saking Injil

Prajanjian Anyar nyerat cetha

Yesus Kristus duk miyosé

Nèng kandhang sapi niku

Para pangon kang sowan sami

Inggih kanggé pratandha

Ing tembé puniku

Sri Yesus paring tuladha

Para pangon tansah anjangkung ngawati

Sedaya ummatira

 

5.  Wonten sarjana tiga kang tebih

Ugi sami andhèrèk mahargya

Miyosira Sang Pamasé

Sami atur pisungsung

Emas, dupa lawan mur ugi

Punika werdinira

Sang bayi ing bésuk

Dipun sembah kadi raja

Wasis paring tamba sedaya sesakit

Nging ing tembé sangsara

 

6.  Purna sampun Éyang nyerat niki

Muga-muga nora dipun wada

Sepuh péngin cawé-cawé

Amaringi pitutur

Kanthi mbabar crita ing nguni

Ingkang ngemu tuladha

Sarta puji sukur

“Sugeng Natal” ing wasana

Katur sedaya sedhèrèk Kristiani

Tentrem salaminira.