21 – 27 April 2013

CAPRICORN ( 21 Des – 19 Jan ):

Minggu iki nasib lan rejekiné apik. Akèh dhuwit mlebu nanging cepet entèk. Tiwas muspra nyèlèngi, sebab yèn dudu panjenengan dhéwé sing nganggo, ana wong liya sing mbutuhaké. Wis, ta, pancèn durung wayahé dadi wong sugih lan kasil. Isih kudu kerja keras lan sinau.

AQUARIUS ( 20 Jan – 18 Feb ):

Minggu iki nasib lan rejekiné gumantung marang keaktipan lan kreasiné dhéwé. Mula aja gumantung marang wong liya. Undhakna semangat lan kawaspadan. Aja gampang ngandel yèn ora weruh dhéwé utawa ana buktiné. Singkirana padudon sebab ora ana bathiné.

PISCES  ( 19 Feb – 20 Mar ):

Minggu iki nasib lan rejekiné nguciwani banget. Kurang beja, malah tuna. Senajan ati panjenengan panas, nanging sirahé kudu tetep adhem. Bisa nahan dhiri, ora gampang kenyonyok lan emosi. Mbaka siji diurus nganti tuntas, supaya dhadhané lega. Aja seneng numpuk gawéyan.

ARIES ( 21 Mar – 20 Apr ):

Minggu iki nasib lan rejekiné seret. Kudu bisa nahan dhiri, ora néka-2, nambahi sanggan utawa permasalahan anyar. Sing isih ana lan bisa digarap, becik dipertahanaké lan diutuni. Aja ngayahi rancangan-2 anyar lan aja terpengaruh wong liya sing mung ngapusi utawa nyasaraké.

TAURUS ( 21 Apr – 20 Mei ):

Minggu iki nasib lan rejekiné rada telat, ora cocog karo jadwal utawa sing ditargètaké. Nanging ing akhir minggu iki ana sing nyenengaké. Beciké bisa nggunakaké kalodhangan jroning kepèpèt. Bisa uga ana kabar sing nyenengaké, mungkin ana rejeki sing babar pisan tanpa kinira.

GEMINI ( 21 Mei – 20 Juni ):

Minggu iki nasib lan rejekiné lagi wiwit bisa dirasakaké. Wiwit nye­nengaké lan bisa nimbulaké semangat anyar. Mangga maju terus, ngayahi rancangané. Aja ngrasa rangu, sing penting usaha lan makarya sing khalal. Yèn iku diutuni lan terus diperjuangaké, mesthi tembé buriné apik.

CANCER ( 21 Juni – 20 Juli ):

Minggu iki nasib lan rejekiné nyenengaké, akèh sing simpati lan bisa diajak kerja sama, kanggo nggedhèkaké usaha utawa nggarap rancangané. Sing sregep, semangat lan percaya dhiri. Supaya ora dianggo dolanan wong liya. Jembarna pangertèning urip ing njaban dhaérah.

LEO (21 Juli – 21 Agust):

Minggu iki nasib lan rejekiné lagi beja temenan. Ana waé rejeki lan penawaran sing mbathèni lan nyenengaké. Kena maju manèh lan kena spekulasi. Sing penting ora seneng owah-2  pendhiriané. Aja gampang terpengaruh rayuan gombal sing bisa ngrerendheti cita-2 panjenengan.

VIRGO ( 22 Agust – 22 Sept ):

Minggu iki nasib lan rejekiné ora stabil. Kadhang kala akèh lan kadhang ora ana. Mula, masalah dhuwit kudu dipétung temenan, aja nganti boros. Yèn ngetikaké dhuwit kudu ana buktiné lan manfaat sing nyata. Pasrawungané diwatesi, panjenengan aja umuk lan seneng omong kosong.

LIBRA ( 23 Sept – 23 Okt ):

Minggu iki nasib lan rejekiné isih sambungané minggu kepungkur, nyenengaké. Kabèh pepénginané keturutan, mèh kaya ora ana kesulitan. Masalah cilik bisa dirampungi sinambi mlaku lan makarya. Tetep aja sok umuk, sebab bisa klebon sétan. Tumindaka sing tansah wicaksana.

SCORPIO ( 24 Okt – 22 Nop ):

Minggu iki nasib lan rejekiné durung setimbang karo kangèlan panjenengan, malah yèn ora ngati-ati bisa lara sing larang wragadé. Mula sing tansah waspada lan ngati-ati, aja ngangsa-angsa. Wektu lan kerjané diatur. Kanggo dhahar, saré lan kerja kudu sing setimbang.

SAGITARIUS (23 Nop – 20 Des ):

Minggu iki nasib lan rejekiné isih perlu kesabaran nunggu lan terus berjuang, aja  nglokro. Pengorbanané ora bakal muspra waton dilakoni kanthi ikhlas. Sholaté aja lali, nyuwun pituduh lan berkahing Allah. Senajan sing di-arep-2 durung maujud, bisa suksès ing bidhang liyané.