Kisah Rama lan Juliet

“Jul, sorry ya? Hubungan asmarane awake dhewe mung bisa tekan sakmene wae.”

          “Nanging Romeo…”

“Tuut tuut tuut…” durung nganti Juliet ngrampungake ukarane, ing sisih kana Ro­meo wis mateni telpune. Juliet mung bisa nangis mingseg-mingseg. Romeo pria sing paling ditresnani Juliet, saiki wis ngiyanati katulusan tresnane.

Yen mbiyen gelem manut ngendikane bapake, nasibe Juliet mungkin ora kaya saiki, digawe cuwa dening kang kinasih Romeo. Nalika semana bapake wis nge­lingake menawa Romeo kuwi pemuda kang playboy, seneng gawe dolanan ce­wek. Nanging wektu kuwi Juliet ora mi­rengke ngendikane bapake, amarga Ro­meo kuwi bagus tur pinter ngrayu, Juliet gampang banget kena rayuwan manise Romeo. Juliet tetep nindakake hubungan asmarane utawa pacaran klawan Romeo tanpa sapangerten bapake.

Akhir-akhir iki Juliet lagi sadhar te­menan yen ngendikane bapake kuwi be­ner. Semingguku kepungkur nalika Juliet lagi dolan-dolan karo Septi kanca rakete, Juliet weruh Romeo mlaku bareng cewek liya. Yen mung mlaku biyasa ngono Juliet ora bakalan sujana, ananging wektu kuwi Romeo mesra banget kanthi ngrangkul pundhake cewek mau. Kepriye Juliet ora jengkel weruh pepujaning ati tumindak kaya ngono kuwi. Nanging ing wektu kuwi Juliet isih nyoba sabar, Juliet mung men­dhem ing atine lan nganggep Romeo ora bakal ngianati tresnane. Sing bisa dilakoni Juliet nalika iku kanggo nyadharke Romeo amung nyindhir-nyindhir nalika omong-omongan karo Romeo. Nanging Romeo ya pancen Romeo pemuda kang Playboy, arepa disindhir kepiye wae tetep ora sadhar.

Juliet iku sabar lan pangerten, kepiye wae tingkahe Romeo mesthi Juliet gelem narima, amarga Juliet tresna banget karo sing jenenge Romeo kuwi. Pria sing kang­go dheweke dadi first love, amarga sa­durune ngenal Romeo, Juliet durung tau ngrasakake rasa tresna kang kaya mang­kono karo priya liya. Mulane nalika weruh Romeo dolan karo cewek liya, Juliet isih nyoba sabar. Nganti kedadeyan telung ndina kepungkur, nalikane Juliet ngonangi Romeo mlaku maneh karo cewek sing dhe­weke ora cewek mau. Ananging kru­ngu apa sing diomongake Romeo lewat telpun entas iki, nyata menawa Romeo milih cewek mau tinimbang Juliet. Atine Juliet kejojoh-jojoh lan kuciwa banget.

***

Dina iki Juliet mangkat kuliyah tanpa ana semangat. Kelakuane Romeo isih wae mbayangi dheweke, Juliet durung bisa legawa ngeculake Romeo, tapi kepiye ma­neh Romeo wis ora ngarepake dheweke. Mula saka iku ing jam kuliyah mau Juliet bola-bali ditegur dening dosene amarga konangan ngalamun ing jam kuliyah. Na­lika ditegur kaya ngono kuwi, Juliet amung bisa meksa mesem.

Jam kuliyah wis rampung, arep mulih menyang kos nanging kok sepi, Septi kan­ca rakete sing uga sak kos-kosane lagi si­buk karo tugas kuliyahe. Biyasane jam 7 bengi utawa bakda isak lagi wae balik menyang kos-kosan. Juliet amung jagong ing bangku taman kampus karo isih mi­kirake Romeo. Juliet meneng anteng karo sepisan-sepisan ngelap eluh kang metu saka mripate.

“Heii, kok nangis ta?”

Juliet kaget nalika ana suwara kang ngagetake lamunane, Juliet mengo nggo­leki asale suwara mau.

“Ohh, sampeyan ta Ma, ora nangis kok, entas wae kliliben lebu iki, angine gek gedhe kok,” jawabe Juliet ngapusi.

“Hehe, ora sah ngapusi Jul, aku ngerti kawit mau kok,” kandhane Rama.

Juliet amung bisa meringis krungu kandhane Rama kuwi, saiki dheweke wis ora bakal bisa ngapusi maneh.

“Geneya Jul kowe kok nangis,” takone Rama.

Ditakoni kaya mangkono, kanggone Juliet dadi peluang anggone bisa nyuntak­ke rasa kang ana ing atine, apa maneh Rama kuwi bocahe penak kanggo curhat. Akhire Juliet crita kabeh masalahe. Rama ngrungokake karo sepisan-pisan manthuk lan aweh panglipur yen ngepasi crita ke­dadeyan sing gawe Juliet nangis.

“Ohh ngono ta Jul critane,” kandhane Rama sawise Juliet rampung anggone crita. “Pranyata critamu meh padha karo critaku Jul,” Rama nerusake.

“Meh padha kepiye Ram?” Juliet pena­saran.

Rama banjur cerita yen dheweke ya entas wae pisahan karo Shinta. Kenya kang sasuwene iki ngrenggani atine. Rama crita menawa Shinta wis ngiyanati tresnane kanthi luwih milih Indra tinim­bang dheweke. Shinta wis ora ngelingi mbiyen nalika Rama mati-matian mbelani dheweke nalika diganggu karo Rahwana, kanca SMA ne sing wis terkenal nakale lan nyimpen rasa seneng karo Shinta. Na­lika semana Rahwana pengin Shinta dadi pacare, nanging Shinta ora gelem, Rah­wa­na banjur ngganggu supaya Shinta ge­lem. Carane Rahwana gawe Shinta kewe­den, lha ing wektu kuwi Rama mati-mati­an mbelani Shinta. Nanging kuwi crita rongtaun kepungkur, saiki Shinta wis ora kelingan marang pangorbanane Rama nalika kuwi.

Krungu critane Rama mau Juliet ya amung manthuk-manthuk, pancen wong ki nek ditresnani kadhang njur sok nglun­jak, rumangsane dheweke ki sing paling apik lan rumangsa gampang nggolek tres­nane wong, dadine bisa cedhak karo sapa wae sing disenengi, yen kaya nasibe cah 2 kuwi mau. Dikhianati karo wong kang ditresnani.

“Jul awake dhewe ora sah kesuwen anggone sedhih, kepiye wae awake dhe­we tetep butuh motivator supaya ora te­rus-terusan anggone sedhih,” kandhane Rama mbuyarake lamunane Juliet.

“Iya bener, lha piye ya Ma?” takone Juliet.

“Jul, piye yen awakmu dadi motiva­torku, aku uga janji bakal dadi motivator­mu Jul,” jawabe Rama.

“Hemm, piye ya?” jawabe Juliet bi­ngung, “Ya dicoba dhisik wae ya, tapi aku janji kok bakal nyoba sabisaku,” Juliet nerusake jawabane. Juliet mesem, Rama uga mesem.

“Jul, yen kisah Romeo Juliet lan Rama Shinta kuwi amung dongeng masa lalu ya?” kandhane Rama.

“Iya Ma, saiki Rama lan Juliet sing ba­kalan dadi crita paling romantis sak do­nya,” jawabe Juliet mantep.

“Bisa wae ta Jul,” jawabe Rama karo njiwit pipine Juliet sing tembem, disusul guyune bocah loro sing gawe merine sing padha weruh.

Kanggo para remaja, ngapa terus-terusan sedhih nalika kabeh bisa diakhiri kanthi happy ending. Masa lalu iku pan­cen endah, nanging nalika masa lalu iku sirna, elinga menawa masa depan iku isih dawa. (*)