Festival Rujak Uleg ing HUT Surabaya

Wali Kota Surabaya Tri Rismaharini (x), didhampingi sawatara nonik-nonik manca negara, lagi ibut nguleg bumbu rujak

Festival Rujak Uleg kanggo mahargya Hari Jadi Kota Surabaya kang ka 719 kaleksa­nan kanthi regeng banget, Minggu (13/5) kepungkur. Re­genge festiwal jalaran sing melu pacakane ‘menor’ lan migunak­ake sragam warna-warna, sa­engga narik kawigaten. Apa­maneh panggung gedhe mawa back ground abang putih kang nutup Jalan Kembang Jepun iku, ndadekake swasana festival saya regeng.

Ana 243 meja kang dicepak­ake lan dikebaki 1.340 peserta Festival Rujak Uleg. Saben pe­serta siyap ngadhep cowek lan mawarna-warna racikan rujak kang wis ana ing mejane dhe­we-dhewe. Wiwit saka lon­thong, timun, cingur, dalah bumbu-bumbune ora kari yaiku petis-e. Para peserta iki me­nganggo sragam sarwa maneka warna kang aneh-aneh. Ana kang dandan kaya lumrahe Ga­thut Kaca, sragam khas Madura, Bali, Dayak, Indian, engga Gypsy.

Dandanane sakehing pe­serta liyane uga ora kalah anehe. Upamane, peserta dan­dan modhel kewan  tomcat-sing mentas iki nyerang kutha Su­rabaya-, kucing garong, ban­theng abang, baya, lelem­but, lan syetan.

Kahanan iki saya regeng ja­laran saben peserta duwe yel-yel kang dibengokake maka­ping-kaping. Adrenge peserta pancen kalebu ngedab-edabi.

Ing acara kang dibukak jam 13.50 WIB iki, pesertane wis padha siyap karo yel-yel lan dandanan aneh-aneh wiwit jam 11.00. Wali Kota Surabaya Tri Rismaharini kang rawuh jam 12.00 uga langsung ngubengi panggonan festival. Ora lali, wong no­mer siji ing Kota Pahlawan iki uga ngaruh-aruhi para peserta.

Kepala Dinas Pariwisata Kota Su­rabaya Wiwiek Wi­dayati ngandharake, Festival Rujak Uleg iki dileksa­nakake saben taun, trepe ing saben mahargya HUT Su­rabaya. Supaya lu­wih regeng, festival uga dirancang kang­go golek peserta paling apik, unik lan nyentrik. Tim juri mbiji kompake pe­serta, sragam sing aneh dhewe, lan yel-yel kang paling apik. Ora mung iku wae, juri uga mbiji karesikan, rasa, lan pasugatan rujak kang paling endah.

Ing antarane kabeh peserta kang teka, tim juri milih 40 pe­serta terbaik klawan bebana dhuwit saben peserta Rp 1,5 yuta. Sabanjure, ing antarane 40 peserta iki, dijupuk peserta lima kang paling apik dhewe, dene bebanane arupa sepedha gunung. “Arane wae festival. Dadi ora ana juwarane,” ujare Wiwiek Widayati.

Saliyane nyambangi para pe­serta, Risma uga nyengkakake melu jejogedan ing ndhuwur panggung. Peserta saka Bank Tabungan Negara kang me­ngang­go sragam rupa emas lan dandan modhel ratu klawan pacakan wulu-wulu banyak ing sirahe, ngajak wali kota lenggak-lenggok ing panggung. Ing ka­lodhangan iki, Konjen AS Kristen F. Bauer lan anggota DPR Indah Kurnia uga melu jejogedan.

Marang para peserta, Risma ngajap Festival Rujak Uleg iki didadekake minangka salah sijine heritage Surabaya. Kegi­yatan iki uga bisa digunakake kanggo njaga kebersamaan lan keruku­nan warga. “Surabaya saya tuwa. Muga-muga tambah maju lan tambah mutu. Muga-muga festival iki bisa terus ka­leksanan nganti ing taun-taun sabanjure,” pratelane.

Ing kalodhangan iki Risma uga melu nguleg rujak rame-rame bebarengan karo tamu un­dhangan ing cowek gedhe ukuran sameter. Bareng karo iku, kabeh peserta festival uga melu nguleg rujake dhewe-dhewe.

Ing tengahing taun iki, Su­rabaya mbudidaya ngajokake acara rujak uleg kasebut me­nyang tingkat donya, yaiku UNESCO. Rencana iku satemene wis dipikirake wiwit taun ke­pungkur kanthi cara ngirimake wakil menyang UNRSCO kanggo nepungake rujak ing lomba ca­gar budaya.

Risma ngakoni, perlu anane bukti-bukti kang trep supaya rujak uleg Surabaya bisa antuk akon-akonane donya. Mula saka iku, pihake mempeng ngumpul­ake bukti-bukti kasebut. “Foto-foto kang ana ing kampung, bo­cah-bocah mangan rujak, engga di­dhasar ing restoran, kabeh dikum­pulake,” tandhese Risma. (Bsh)