Kompetisi Senam Asli Eropa? Pranyata Indonesia uga Bisa Juara!
Diposting oleh : Administrator
Kategori: Anyar Katon - Dibaca: 28 kali

Atlet senam ritmik Nabila Evandestiera kasil nggondhol medhali emas lan medhali perak ing kajuwaran ing Berlin mentas iki. Nabila dadi siji-sijine atlet saka sanjabane Eropa kang melu ing olah raga asli Eropa ksb.

Keplok rame dikantheni menthangake gendera abang putih saka suporter Indonesia ngramekake suwasana ing gedung Olympiapark ing Berlin, Jerman. Rasa seneng lan mongkog warga Indonesia ing Jerman iku kedadeyan sawise Nabila Evandestiera bisa oleh medhali emas lan medhali perak ing kajuwaran 4th Diadem Cup Rhythmic Gymnastics.

Ora mung kasil dadi juara, Nabila uga ngukirake jenenge merga dadi siji-sijine atlet senam ritmik saka sanjabane Eropa kang tampil lan juara ing kajuwaran kang dianakake tanggal 24-25 November 2018 ksb. Ora gampang dadi juara ing cabang olah raga kang dikembangake ing Eropa sajege abad ka-18 iku.

“Terus terang tumrap kita iki ora gampang. Ngungguli para pesaing saka Eropa ing olah raga kang asline saka dheweke mujudake prestasi luar biasa kang patut disyukuri. Kita mongkog pranyata kita bisa” ujare Eko Pudjihariyanto, Ketua Umum Persani DKI Jakarta kang ngancani Nabila.

 

Mesin diplomasi Indonesia

Saka nem kategori kang dilombakake, Nabila oleh medhali emas kanggo kelas Senior kategori Ball ApparatusRhythmic Gymnastics lan medhali perak kanggo kelas Senior kategori Clubs Apparatus Rhythmic Gymnastics. Nabila kasil ngalahake lawan-lawane saka Bulgaria, Latvia, Rusia, Jerman, Spanyol, Republik Ceko lan Cyprus. Malah kanggo Jerman dhewe, wakil sawenehing negara bagian uga dadi saingane Nabila, ing antarane tuan rumah Berlin.

Prestasi Nabila uga oleh apresiasi nalika dheweke lan tim pesenam Indonesia disugata ing Kedutaan Besar Republik Indonesia ing Berlin. Nabila dianggep aweh pangarep-arep anyar yen Indonesia bisa dadi icon juara senam ritmik, senajan cabang olah raga iki asale saka Eropa.

“Aku melu seneng lan matur suwun marang Nabila. Kowe kanthi konkrit wis dadi bagian saka mesin diplomasi. Ka­suksesanmu iki, mbiyantu misi KBRI luwih ngenalake Indonesia minangka bangsa kang duwe prestasi marang masyarakat Eropa utamane Jerman” ujare Duta Besar RI kanggo Jerman, Arif Havas Oegroseno.

Ing SEA Games 2017 kepungkur, Nabila menangake medhali perunggu loro lumantar nomer senam ritmik Hoop Apparatus lan Ball Apparatus. Saikine, lumantar prestasine, Nabila lan pesenam Indonesia liyane wis diundang maneh menyang ke­juaraan senam ritmik Diadem Cup Rhythmic Gymnastics taun ngarep ing negara Landa. (d/ist)***

Berita Terkait

img

Samak Minggu Ini

img

img

Sumber Semangat

Yen kowe weruh semut kepleset lan ceblok ing banyu, mula angkaten lan tulungana dheweke...  Sapa ngerti kuwi dadi sebab anane ampunan tumrapmu ing akherat mengko.

Klik

FESTIVAL CAGANARES

Caganers yakuwi sawijining festival kang dianakake saben wulan Desember ing daerah Catalunya utawa Barcelona, Spanyol. Festival iki bakal ndadekake sapa wae gedheg-gedheg. Kepriye ora, merga masyarakat ing kono ngumpulake maneka figur tokoh dunia kang lagi mbukak kathoke lan (ngapunten) bebuwang. Tokoh duniane macem-macem, kaya Ronaldinho, Albert Einstein, Michael Jackson, Donald Trump, Barrack Obama, lsp. Festival iki ngemu teges yen sapa wae satemene padha tanpa ndeleng trah utawa jabatane nalika bebuwang. (d/ist)***

Pethilan

LP Banda Aceh ribut, 113 napi kabur

Sapa sing betah nang pakunjaran?

Cawe-cawene guru ora bisa digenteni

Apamaneh sing jenenge Pak Google

600 dina kasus penyerangan Novel durung kawiyak

Aparat lagi asyik ngetung dina mbok­menawa