Nyegah Kanker kanthi Urip Pener
Diposting oleh : Administrator
Kategori: Anyar Katon - Dibaca: 206 kali

Kanker mujudake jinis lelara kang kadidene momok kanggone sapa bae. Mula, sanadyan ing ngendi papan wis kerep dirembug, kanker tansah narik kawigaten wong akeh. Kejaba tenaga medis, uga masyarakat. Apamaneh, mundhak dina, bab kanker iki tansaya ngrembaka. Jinis lan panyebarane, nanging uga maneka usada kang kasil diupayakake panaliti lan tim medis.

Durung suwe iki, dr. Dradjat Ryanto Suardi, Sp.B (K) Onk njlentrehake bab kanker payudara. Dokter kang uga anggota Komite Penanggulangan Kanker Nasional Kemenkes RI kasebut ngandharake faktor risiko dumadine kanker payudara.

Faktor kang sepisanan yaiku riwayat kulawarga. “Yen rama utawa ibune ana sing kena kanker, anake bakal duwe risiko kena. Dene yen sing kena simbahe, risikone luwih cilik, nanging tetep ana,” kandhane. Kanker iki, imbuhe, umume uga namani wong kang umure 35 taun mendhuwur. Kanggone estri, risiko uga luwih gedhe marang kang anggone nggarap sari luwih cepet (enom) lan sing olehe menopouse luwih tuwa tinimbang wong wadon liyane.

Semono uga pawestri kang ora mbobot, ora nglairake, lan ora nyusoni anak. “Amarga pawestri nduweni homon kang kudune aktif nalika mbobot lan nyusoni. Yen banjur ora dinggo, bisa njalari kanker,” ujare.

Dene Prof. dr. R. M. Padmosantjojo, Sp. BS, kang uga dadi narasumber ing acara kasebut, njlentrehake ngenani kanker otak. “Uteg mujudake perangan awak kang wigati lan njlimet. Mula yen ana gangguwan, anggone ngupaya uga ora gampang,” kandhane.

Dokter kang praktik ing RSUPN Cipto Mangunkusumo kasebut nelakake yen gangguwan ing uteg bisa njalari rong bab. Yaiku tumor otak, lan kanker sumsum tulang belakang. “Yen operasi, anggone mbukak ora bisa byak ngono wae. Kudu tliti lan ngati-ati,” ujare dokter kang awake gedhe dhuwur lan rikmane rada gondrong iku.

Dokter Dradjat lan uga dokter Padmosantjojo padha-padha negesake yen nyegah kanker iku benget wigatine. Memangan sing ngandhut gizi, ngelongi daging, ora ngrokok lan ora gumbul ing satengahe wong-wong kang ngrokok, nglakoni urip kanthi seneng amrih ora stress, uga olah raga sing ajeg. “Priksa rutin menyang rumah sakit kanggo ngerteni kondhisi awak,” imbuhe dokter Dradjat. Lan siji maneh pesene para tenaga media senior iku. “Yen wis konangan ana tumor utawa kanker, aja kepincut ngombe kulit iki kuwi, oyod werna-werna. Mertamba marang rumah sakit, lan nglakoni sakabehing pangusada kang diprayogakake,” kandhane Prof. Padmosantjojo.

(nn)

 

Berita Terkait

img

Samak Minggu Ini

img

img

Sumber Semangat

Ati kang atos gampang nemoni dalan buntu.

Klik

BANGUNAN MODEL DHUWIT

Dhuwit pancen mujudake alat tukar kang penting kanggo masyarakat dunia. Saking pentinge nganti-nganti dadi inspirasi pembangunan sawijining gedhung ing Kaunas, Lithuania. Desain bangunan tingkat iki katon nyolok kanthi desain dhuwit minangka wujud fasad njaba bangunan ksb. (d/ist)***

Pethilan

Banyu Tarum Barat saya reget

Kan wis wiwit ndhisik?!

Pulisi kangelan ngluru sing nindakake teror obong-obong montor ing Semarang

Mumpung Imlek, coba njaluk tulung ahli Feng Shui…

Ngawekani golput, kudu intens ngenalake surat suwara cacah lima

Sing akeh mengko dudu golput, na­nging golyeng, golongan puyeng