Timnas Skateboard Indonesia Arep Nggawe ‘Kejutan’ ing Asian Games 2018
Diposting oleh : Administrator
Kategori: Anyar Katon - Dibaca: 300 kali

Timnas skateboard Indonesia ngajab bisa gawe ‘kejutan’ ing Asian Games 2018 iki. Cabang skateboard bakal dianakake ing Jakabaring Sport City Palembang, Provinsi Sumatera Selatan.

“Minangka tuan rumah, kita ngajab bisa oleh emas, pancen tumekane saiki rival paling abot yakuwi Jepang,” ujare Pelatih Kepala Skateboard Timnas Indonesia Jojaya Charles Kusuma ing Pekanbaru bab kalodhangane ing Asian Games 2018 durung suwe iki. Jojaya Charles Kusuma nambahake skateboarder andel-andele timnas nganti saiki terus disiapake. Salah sijine yakuwi kanthi melu pertandhingan skatboard ing Singgapur awal Agustus kepungkur.

Manut priya kang akrab disapa Charlie Hobbies iki, peta kekuatan skateboad Asia isih didominasi Jepang. Negara Matahari terbit iku aweh kawigaten gedhe marang para skateboarder, kaya arena lan pembinaane.

Malah, skateboard Jepang wiwit nuduhake tajine ing taraf internasional, kaya Yuto Horigome kang bola-bali wis ngicipi podium Street League Skateboarding ing Amerika Serikat.

Nanging, Charlie Hobbies nambahake yen sawenehing negara liya uga wis wiwit nyaingi dominasi skateboarder Jepang. Salah sijine yakuwi Tiongkok, kang wis rong taun iki mbangun pasukan kanggo Asian Games 2018 nganti menyang Olimpiade 2020.

“China (Tiongkok) wis suwe siyap. China nggawe tim kang arane Shaolin Skateboarders Army,” ujare Charlie.

Gegandhengan karo kans Indonesia, Charlie nganggep yen atlet-atlet Indonesia kanthi persiapan mepet tetep bakal nyoba aweh kang paling apik. Indonesia bakal ngoptimalake nem atlete ing nomer kang ditandhingake, yakuwi street sarta park (bowl) kanggo putra lan putri.

Kanggo nomer park putra, Timnas Skateboard Indonesia bakal ngedhukake Sanggoe Dharma Tanjung lan Gregorius Aldwin Angka Widjaja. Dene ing nomer street, ana Pevi Permana lan Jason Dennis Lijnzaat.

Jeneng-jeneng iki wis cukup dikenal ing olahraga skateboard Tanah Air. Pevi Permana mujudake siji saka sakehing skateboarder Indonesia kang nganglang donya.

Sawenehing prestasi wis dikumpulake, wiwit saka juara nasional 2005 nganti 2015, juara Asia ing taun 2007, 2009, sarta 2010, lan kang cukup mongkogake yakuwi mlebu 40 Skateboarder terbaik ing kajuwaran dunia skateboard ing Amerika taun 2009.

Dene Sanggoe Dharma mujudake peringkat katelu ing ajang FISE World Malaysia 2014, peringkat nem dunia ing X-Games ing Shanghai 2015, lan skateboarder Indonesia pisanan kang main ing Street League (SLS) ing Barcelona 2017.

Sauntara kuwi tumrap atlet putri, Timnas Skateboard Indonesia mung bakal ngedhukake loro, salah sijine yakuwi Nyimas Bunga Cinta. Skateborder umur 12 taun iki bakal mudhun ing rong nomer. Dene atlet sijine maneh yakuwi Aliqqa Kayyisa.

“Kanggo atlet putri ora ana target medhali merga lagi pisan kuwi melu pertandingan. Bunga Cinta iki isih level pemula, lagi umur 12 taun, nanging mujudake aset Indonesia merga duwe bakat. Dheweke calon juara,” imbuhe Charlie.

Saben nomer ing cabang olahraga skateboard bakal ngrebutake medhali emas loro, saengga totale ana emas papat Asian Games 2018 ing cabang olahraga ekstrim iki. Saben atlet ing saben nomer padhadene saingan kanggo oleh biji sing paling dhuwur, wiwit saka babak kualifikasi nganti final. (d/ist)

Berita Terkait

img

Samak Minggu Ini

img

img

Sumber Semangat

Ati kang atos gampang nemoni dalan buntu.

Klik

BANGUNAN MODEL DHUWIT

Dhuwit pancen mujudake alat tukar kang penting kanggo masyarakat dunia. Saking pentinge nganti-nganti dadi inspirasi pembangunan sawijining gedhung ing Kaunas, Lithuania. Desain bangunan tingkat iki katon nyolok kanthi desain dhuwit minangka wujud fasad njaba bangunan ksb. (d/ist)***

Pethilan

Banyu Tarum Barat saya reget

Kan wis wiwit ndhisik?!

Pulisi kangelan ngluru sing nindakake teror obong-obong montor ing Semarang

Mumpung Imlek, coba njaluk tulung ahli Feng Shui…

Ngawekani golput, kudu intens ngenalake surat suwara cacah lima

Sing akeh mengko dudu golput, na­nging golyeng, golongan puyeng