Wisata Petik Madu Lawang
Diposting oleh : Administrator
Kategori: Plesir - Dibaca: 211 kali

Sesawangan lan Nambah Wawasan

Dolan lan plesir mesisan antuk elmu, umume dadi pepenginane para ibu kanggo putra-putrine. Amrih bisa lerem anggone wis njinggleng sinau, nanging ora banjur ketungkul dolanan gadget lan medhia sosial.

Bab iku bisa katindakake kanthi mara menyang Lawang, kabupaten Malang. Yaiku, ing papan wisata Petik Madu. Kejaba sesawangan tawon lan ubarampe kanggo ngupakarane, uga bisa sinau carane budidaya lan dagang madu. Ing papan iki kacawisake sesawangan asli ngenani uripe tawon, teknik nangkarake, nganti carane manen madu. Kabeh iku dijlentrehake petugas ing papan kasebut kanthi gamblang.

Manut Hariyono, pengelola Wisata Petik Madu, agrowisata iki wiwitane mligi kanggo srana warga Lawang sinau budidaya tawon madu. Nanging suwening suwe, akeh masyarakat liyane sing kepengin ngerti. Ora mung saka sakupenge Lawang, nanging uga saka kutha liya, nganti njaban rangkah.

“Saben sasi udakara 1500 nganti 3000 pengunjung. Ya ana klompok tani, ibu-ibu PKK, lan sing paling kerep malah pelajar,” kandhane.

Ing lahan sing ambane 8 hektar iku, Hariyono sejatine mbacutake usaha sing wiwitane ditindakake wongtuwane. “Adhi-adhiku ora ana sing gelem. Mula aku minangka anak mbarep ya banjur cancut taliwanda,” ujare.

Peternakan tawon madu iku wis madeg wiwit 1990, dipandhegani Gunawan, ya ramane Hariyono. Sabanjure, taun 2011 Hariyono ngembangake dadi papan wisata petik madu. “Daktata dadi maneka bageyan. Saengga pengunjung bisa nyinau bab uripe tawon, maneka jinis tanduran, uga sing gegayutan karo kasarasan,” imbuhe Hariyono.

Ing papan iki, tawon madu sing diternakake ana telung jinis. Yaiku Apis Melilfira saka Asutralia, Acerana sing mujudake tawon lokal, uga Tringod sing cilik nanging ora ngentup. Sing paling akeh gunggunge yaiku Apis Melilfira, amarga bisa ngasilake madu paling akeh tinimbang liyane. Dene tawon-tawon Tringod sing tutut, ngasilake madu sing rada cuwer. “Rasane rada kecut, nanging gedhe mupangate, bisa kanggo obat,” jlentrehe Hariyono.

Isih manut katrangane Hariyono, akeh pengunjung sing nakokake wujude madu asli. “Ya pancen angel mbedakake madu asli lan campuran. Cara paling ampuh ya diuji ing laboratorium,” kandhane. Saengga, bisa konangan enzim lan kadhare. Madu asli, imbuhe Hariyono, yen kanggo sumber tenaga butuh 6 sendhok saben dina.

Ing Wisata Petik Madu Lawang, saben sasi Hariyono kasil manen 70 nganti 120 kg madu ing saben kothak. Dene kejaba madu, tawon uga bisa ngasilake royal jelly, bee pollen lan propolis. Propolis yaiku getah pupus godhong lan kuncup kembang sing diproses karo idune tawon.

Saiki, Wisata Petik Madu wis dadi salah sijine binaan Dinas Pariwisata dan Dinas Kehutanan Kabupaten Malang. (prili)

 

Berita Terkait

img

Samak Minggu Ini

img

img

Sumber Semangat

Saupamane wae kabagyan iku bisa dituku, mesthi wong-wong sugih bakal nuku kabagyan mau. Lan kita bakal kangelan oleh kabagyan ksb merga wis diborong wong kang sugih mau. Nanging tujune ka­bagyan kuwi anane mung ing njero  ati lan pikiran. Ka­bagyan iku mung bisa didu­weni dening wong kang pin­ter nindakake sukur.

Klik

ARIF WICAKSANA

Grengsenge mbabat alas kanggo kabutuhan pembangunan kanthi ngurbanake sakehing warna-warna ijo ing alam, pranyata isih ana uga kang gelem ngalah lan ngajeni banget marang ‘pabrik’ oksigen ksb. Iki salah siji contone, dimen nylametake wit siji-sijine, panggawene dalan nasional lila dienggokake. Dadi, ayo ndadekake wit-witan minangka karib kita, ing ngendi wae. (d/ist)***

Pethilan

Amandemen gumantung keputusan politik

Gumantung kepentingane uga

Koalisi padhadene ngenteni capres cawapres

Intip-intipan rupa lawas

Lobi-lobi politik saya kerep

Kasak kusuk, nyang-nyangan…