Bupati Nganjuk Taufiqurrahman Kejiret KPK Maneh
Diposting oleh : Administrator
Kategori: Anyar Katon - Dibaca: 36 kali

Rekor Operasi Tangkap Tangan (OTT) Komisi Pemberantasan Korupsi (KPK) taun iki akhire pecah. Iku sairing karo operasi sepi lembaga superbodi  kasebut marang Bupati Nganjuk Taufiqurrahman, Rebo (25/10) kepungkur. OTT iku mujudake kang ka 18 sasuwene taun iki utawa saangka sandhuwure taun 2016, yaiku kaping 17.

 

Ora mung iku wae, OTT marang Bupati Nganjuk uga nandhesake yen tersangka sing menang praperadilan saka KPK bisa bali dijiret kasus korupsi. Sadurunge, Taufiqurrahman ditetepake minangka tersangka nalika Desember 2016. Politikus PDI Perjuangan (PDIP) kasebut disangka nampa gra­tifikasi lan kesangkut pemborongan sakehing proyek ing Nganjuk taun anggaran 2009. Proyek iku antara liya pem­bangunan Jembatan Kedungingas, rehabilitasi saluran Melilir, perbaikan dalan Sukomoro-Kecubung, rehabilitasi saluran Ganggang Malang, lan pemeliharaan berkala dalan Ngang­krek-Blora.

Nanging, bupati rong periode kasebut lolos saka jiret KPK sairing dikabulake gugatan praperadilan ing Pengadilan Negeri (PN) Jakarta Selatan nalika 6 Maret kepungkur. Hakim tunggal Iwayan Karya nalika iku mrentahake KPK mbalekake perkara kasebut menyang kejaksaan slaras karo surat kesepakatan bersama (SKB) antarane Kejaksaan Agung (Kejagung), Polri, lan KPK.

SKB iku nyebutake, yen ana rong instansi sing nangani perkara padha, perkarane dibalekake menyang instansi awal sing nindakake penyelidhikan. Sadurunge diproses KPK, perkara kasebut pancen ditangani kejaksaan.

Engga pawarta iki ditulis, Taufiq-paraban akrabe Taufiqur­rahman- isih nindakake papriksane tim satgas penindakan KPK. Kalungguhane durung tersangka. Dheweke diamanake tim KPK ing Nganjuk jalaran dinuga kesangkut transaksi suap (beselan) ajine atusan yuta ripis. “Tamtu (dhuwit sing di­amanake, Red) ana gandhenge karo kang dadi wenange kang gegayutan minangka penyelenggara negara,” kandhane Juru Wicara KPK Febri Diansyah.

Urut-urutan panangkepe Taufiq iku klakon pating blasur. Saperangan sumber kang pinercaya nyebutake yen Taufiq diamanake ing jalan raya sacedhake Hotel Borobudur, Jakarta, jam 13.00 bareng karo sisihane, Ita Triwibawati (Sekda Jom­bang), lan saperangan pejabat ing lingkungan Pemkab Nganjuk.

Gegayutan bab iku, Febri mesthekake yen Taufiq diaman­ake ing Nganjuk. Pancen ana uga sawatara pehak sing ditangkep ing Jakarta. Mung, dheweke wegah nyebutake sapa wae pehak liyane sing diamanake ing OTT kang ka-enem ing Jawa Timur sasuwene taun iki kasebut. “Ana wong 15 sing di­amanake ing daerah (Nganjuk) ing Jawa Timur lan ing Jakarta,” tandhese Febri.

Dheweke nambahake, pangungkape transaksi kang dinuga beselan kasebut wiwitane ditindakake tim satgas KPK ing Nganjuk. Sawise iku saperangan anggota tim ngamanake sa­kehing pehak ing Jakarta sing dianggep gegayutan karo transaksi kasebut. “Wektu sing digunakake kanggo mriksa dipolake yaiku 1x 24 jam,” ujare.

Manut katrangan kang kasil dikumpulake wartawan ing Nganjuk, tim KPK nalika iku ngamanake saperangan kepala dinas lan pejabat ing lingkungan Pemkab Nganjuk. Antara liya yaiku Kepala Dinas Lingkungan Hidup (LH) Harijanto, Kabid Ketenagaan Dinas Pendidikan (Dispendik) CahyoSarwo Edy, Kabid Pendidikan Dasar Dispendik Suroto, sarta ajudan bupati Oki. Dheweke kabeh dipriksa ing Mapolres Nganjuk.

Ana katrangan sing nyebutake, panangkepe Bupati Tau­fiqurrahman sing iki gegayutan panduga beselan (suap) proses idin amdal sing ditangani Kepala Dinas LH Harijanto lan panduga gratifikasi jabatan ing lingkungan Pemkab Nganjuk. Klebu panduga gratifikasi jabatan sing nyangkutake sakehing kepala sekolah. “Sakehing perusahaan sing ngajok­ake idin amdal dinuga urunan kanggo nglancarake prosese,” kandhane sumber kasebut.

Dene panduga gratifikasi jabatan ing lingkungan Pemkab Nganjuk wis santer keprungu sasuwene sawatara taun pung­kasan iki. Sadurunge KPK uga wis mriksa sakehing pejabat gegayutan kasus kasebut ing Jakarta.

Kasatreskrim Polres Nganjuk AKP Yogi Ardi Kristanto sing dijaluki katrangane ngenani pemeriksaan sakehing pejabat lan PNS ing Polres Nganjuk mbenerake. Emane, dheweke wegah mbeberake kanthi rinci materi pemeriksaan. “Iya ana pemeriksaan KPK. Kasuse apa wae uga durung weruh,” kan­dhane.

Panangkepe Taufiqurrahman sakala antuk tanggapan saka DPP PDIP. Sekjen DPP PDIP Hasto Kristiyanto ngandhakake, partaine langsung mecat Taufiq saka kalungguhane minangka kader partai.

Hasto nandhesake, PDIP wis bola-bali ngelikake Taufiq sing njabat Bupati Nganjuk supaya ora main-main lan nin­dakake pelanggaran hukum. Malah, ing anggane partai, Tufiq wis ora duwe jabatan.Dheweke dibebastugaske saka jabatan ketua DPC PDIP Nganjuk wiwit 26 Januari 2017 merga sebab ora dhisiplin. Nanging, dheweke ora nyebutake dhisiplin apa kang diterak. “Sing gegayutan wis diwenehi saksi organisasi,” ujare lulusan Universitas Gajah Mada (UGM) Jogjakarta iki.

Ora mung iku wae. Manut kandhane, minangka wujud tegase PDIP anggone menehi sanksi marang Taufiq, ing pilkada Nganjuk taun ngarep, pehake ora menehi reko­mendasi marang Ita Triwibawati bojone Taufiq. Sasuwene iki bupati rong periode iki tansah merjuwangake sisihane supaya maju dadi calon bupati. “PDI Perjuangan tegas ora nyalonake pawongan sing dikarepake dening Taufiq,” ujare politikus kelairan Jogjakarta iki.

Hasto ngandhakake, satemene Ketua Umum PDIP Mega­wati Soekarnoputri tansah ngelikake para kadere sing diper­caya minangka penyelenggara negara supaya ora main-main klawan pelanggaran hukum. Ancaman sanksine tegas banget. Sapa wae sing ketaman OTT dening KPK, nalika iku uga partai langsung ngetokake surat pemecatan.

 

Ruwang pejabat Nganjuk disegel

Saliyane niti priksa sakehing pejabat lan PNS, KPK langsung nyegel ruwang kerja saperangan pejabat Pemkab Nganjuk. Saora-orane ana ruwangan papat sing disegel komisi antirasuah awan iku. Yaiku, ruwang Kepala Dinas Lingkungan Hidup (LH) Harijanto. Kabid Pendidikan Dasar (Dikdas) Dinas Pendidikan Suroto, Kabid Ketenagaan Dinas Pendidikan Cahyo Sarwo Edy, lan ruwang Kepala Dinas Pendidikan Ibnu Hajar.

Penyidik KPK masang closed circuit television (CCTV) ing perangan njero ruwang kerjane Harjanto. Kamera pengawas kasebut dipasang ing sisih pojok ndhuwur ruwang kantor sing mapan ing Jalan Gatot Subroto iku.

Saluwihe, KPK masang garis KPK (KPK line) ing lawang kerjane Harjanto. Ing perangan bolongane kunci lawang dipasang segel. “Petugas ninggalake ruwangan, nanging ora nggawa apa-apa,” kandhane sumber kang pinercaya kasebut.

Ing wektu bebarengan, ana tim penyidik liyane sing nin­dakake penyegelan ing dinas pendidikan. Ing Kantor ing Jalan Dermojoyo iku.

Kabag Humas Pemkab Nganjuk Agus Irianto nalika dijaluki katrangane bab penyegelan dening KPK ing dinas LH lan dinas pendidikan mbenerake. Mung, Agus kandha ora ngerti persis ruwangan ngendi sing disegel. “Aku durung ngerti perkem­bangane,” kandhane Agus. (Tim)

Berita Terkait

Samak Minggu Ini

img

img

Sumber Semangat

Lumakune wektu luwih cepet katimbang mlakune mega. Sing sapa kang wektune mung kanggo ngabekti lan ngibadah mring Gusti Allah, mula iku wektu lan umure kang satemene …

Klik

LUKISAN ING WULU

Wulu pranyata bisa dadi salah sijine media lukis kang eksotik banget. Nanging mung wong-wong tinamtu wae kang bisa nindakake, yakuwi wong kang telaten lan sabar jalaran lukisan edipeni iki ora gampang ditindakake sarta butuh ketelitian kang dhuwur banget. (d/ist)

Pethilan

Kanggo Asian Games, Indonesia kekurangan jaran level internasional

Sing akeh pancen kambing hi­tam…

Setya Novanto dianggep nuduhake tumindak kurang becik

Paribasan ngandhakake; tinggal glanggang colong playu!

Setya Novanto wusanane mlebu tahanan KPK

Ngenteni lelakon sabanjure