Parasara Lair (9)
Diposting oleh : Administrator
Kategori: Padhalangan - Dibaca: 202 kali

Ndulu kahanan mangkono para panakawan padha miris, dene momongane kang lagi sungkawa, ora bisa sirep sungkawane, malah kasor ing yuda nganti seda kauntal dening raja yaksa. Para panakawan padha tetangi­san, temah padha bingung pating bilu­lung. Pepuntoning rembug kabeh kaha­nan iku kudu enggal diaturake marang sing kawogan.

Genti kang cinarita, kang ana ma­dyaning wana, Resi Sakutrem, Prabu Partawijaya, Prabu Ambinasa lan Puthut Supalawa padha rerembugan kepriye anggone ngupadi mendrane Bambang Sakri.

“Yayi Prabu Partawijaya, Sang Prabu Ambinasa sarta Puthut Supalawa. Sapu­nika sampun dumugi madyaning wana, tebih saking Pertapan Saptaharga, anggen kita sami ngupadi Bambang Sakri, teka dereng wonten titikanipun badhe pinanggih. Kula nyuwun rembag ndika Sang Prabu Partawijaya,” pangan­dikane Resi Sakutrem ingkang lagi sung­kawa jero.

“Kangmas Resi Sakutrem, punika wau sampun lumampah mangaler, samangke dipun gantos mangetan, mbok bilih sa­geg enggal pinanggih,” ature Prabu Partawijaya.

“Sang Resi, kalawau saben wonten tiyang lumampah, temtu kula tangleti mbok bilih sumerep lampahipun tiyang bagus satunggal dipun tutaken batur sekawan ingkang rupinipun awon tur lucu. Nanging sedaya punika sami mboten mangertos, mboten nyumerapi. Pramila kula piyambak dados bingung,” ature Prabu Ambinasa nambahi.

“Sang Adi Panembahan, punapa mboten prayogi dipunperang dados sekawan kemawon? Paduka Sang Resi Sakutrem tindak ngidul. Sinuwun Prabu Partawijaya mangetan. Sinuwun Prabu Ambinasa mangaler, dene kula pun Pu­thut Supalawa mangilen. Mbok bilih mboten kadangon, saged enggal pinang­gih kalawan ingkang dipun upadi?”

Kocapa aturipun Puthut Supalawa du­rung nganti ditanggapi, kasaru playu­ne para panakawan karo padha tawang-tawang tangis.

“Hiiih lae-lae. Niki gek pripun, lha, enten kedadosan kados ngaten?  Hai aih aih aih. Sang Adi Penembahan, keleresan Resi Sakutrem napa sampun onten mriki. Aeh aeh, kula ajeng matur, ngaturaken ketiwasan, Deen, huu huu hhuuu,” ature Semar karo nangis.

“Wo ho ho. Niki kepripun, Ndara? Ketiwasan, ho ho hooo, hoaa hoa,” Gareng nggero.

“Ketiwasan kepriye Gareng? Ayo matura, aja mung nangis wae,” dhawuhe Sakutrem.

“Wu hhuu, hu hu hu. Keplantheng, eh kepareng matur, tiwas, ndara,” ature Petruk.

“Sing tiwas sapa Petruk? Aja nangis wae, matura dhisik amrih cetha.”

“Hu waaa, ha ha ha. He he he. Niki kula ajeng nangis. E, empun nangis, ning ajeng maturrr, hu hu hu. Kula Bagong, ajeng laporan, wau onten pembunuhan kejam.”

“Heh punakawan. Ayo salah sawiji leren anggone nangis, matura sing cetha, ana kedadeyan apa? Pamrihe enggal bisa ngrampungi perkara, kudu ana sing matur ora mubang-mubeng kaya kitiran,” dhawuhe Prabu Partawijaya.

“Kula mawon sing ajeng matur. Kula pun Petruk, niki kepareng matur………….

Berita Terkait

Samak Minggu Ini

img

img

Sumber Semangat

Brubah lan tangi luwih edi banget tinimbang meneng lan mung ngimpi tanpa nindakake apa-apa.

Klik

Pejabat Lomba Mangan Krupuk

Pengetan dina Ulang Taun Kamardikan RI ing ngendi-endi ditindakake kanthi maneka acara lan lomba. Semono uga ing Pemkot Semarang. Mung sing rada beda, sing dadi pesertane ing kene yakuwi pejabat-pejabat Pemkot lan DPRD, Kapolres, Danlanal lan Dandim. Katon ing gambar sawenehing pejabat kanthi kebak semangat lan cepet-cepetan melu lomba mangan krupuk kang digelar ing Balai Kota Semarang. (d/ist)***

Pethilan

Niyate Panitia Angket DPR marang KPK konangan

Sapinter-pintere mbungkus tai, wusana mambu uga

Gegandhengan klawan Merah Putih kang kuwalik, Malaysia resmi njaluk ngapura

Kok dibolan-baleni terus ya?

Ana kampanye anti korupsi liwat gambar kartun

Saking lucune koruptor kita