Kasiku Upataning Ibu (12)
Diposting oleh : Administrator
Kategori: Cerita Rakyat - Dibaca: 113 kali

Playune wong nyalawadi sluman-slumun, menggak-menggok. Longkangan-longkangan suyasa njeron beteng sajak wis kulina diambah. Ewasemono Adipati Tunjungseta meksa isih bisa mblan­cang playune. Lelorone katemahan uleng jroning banda­yuda maneh. Nanging Adipati Tunjungseta kena katingkes dening wong nyalawadi mau. Wis dipithing arep diprajaya.

Tanpa kinira dumadakan wong nyalawadi mau mencelat ditendhang Senapati Rumaksa. Paraga mau krengkangan banjur mletik plembangan ing wit-witan karang kitri pinggir beteng lan mencolot mudhun neng sanjabaning  puraya kadipaten. Sageblasan wong nyalawadi kasebut wis ilang kaya diuntal bumi.

Ora antara suwe katon Kembangarum mlayu-mlayu mrepegi Adipati Tunjungseta. Kambi tawan-tawan tangis nguningakake lamun pusaka-pusaka piyandel Sukadana dicidra Pambudi.

“We lha! Jati kesusupan ruyung. Sukadana wis kalebon telik mangendra jala!” wuwuse Adipati Tunjungseta karo getem-getem. “Heiii, Rumaksa! Jebul kowe wis gendhu saengkuk karo keponakanmu Si Pambudi kanggo njongkeng kawibawanku, ya?! Mula kowe kudu dipatrapi ukum gantung!”

Adipati Tunjungseta nuli nguwuh-uwuh sora ngundang prajurit jaga kemit. Sanalika para prajurit caos sami gumrudug teka lan didhawuhi ngrangket Senapati Rumaksa dilebokake krangkeng tahanan. Rampung kuwi Adipati Tunjungseta banjur gegancangan menyang dalem kepatihan saperlu ngrembug kahananing praja kang banget mutawatiri.

“Rama Patih, rumiyin partisara saking Majapahit ical kanthi nganeh-anehi. Samangke kula nedya kaprajaya lajeng kasusul murcanipun Lontar Kutaramanawa sarta Kunta Baskara,” ature Adipati Tunjungseta bablas nuju ancas. “Gandheng maling pusaka menika Pambudi, pun Rumaksa bapa pamanipun sampun kula rangket. Mila jengandika age tumandang mundhut wangsul pusaka-pusaka piandel Sukadana. Mangga Kalibening dipun sungsang bawana balik. Pambudi, Buyut Pradhah sacindhil abangipun suwawi katumpes tapis!”

Sawuse paring dhawuh mangkono Adipati Tunjungseta tanpa pamitan terus mak semparet kundur menyang Puraya Kadipaten. Patih Anggabayu banjur magita-gita nimbali Senapati Warukung kadhawuhan nyawegakake prajurit sacukupe. Ing dina esuke Patih Anggabayu dikawal prajurit telung puluh jejaranan tumuju Kalibening.

Sauntara kuwi Patih Baunata rumangsa wis bola-bali kecangar lakune, nganti olehe arep nyidra yuswane Adipati Tunjungseta jugar wigar dening Senapati Rumaksa. Dudutane, dheweke kudu enggal nyawiji lan Raden Kuda Nisita ing Kalibening saperlu ngimpun kekuwatan lan golek reka daya kanggo mungkasi laku ala durcarane Raden Tunjungseta sakandhahan.

Gancanging carita, Patih Baunata wis kelakon kumpul karo………….

Berita Terkait

Samak Minggu Ini

img

img

Sumber Semangat

Yen kita weruh prau ing sandhuwure banyu kuwi bab kang lumrah, nanging dadi bebaya yen ana banyu ing njero prau. Mula kita kena mapanake ati iki ing jagad nanging aja nganti mapanake jagad ksb ing ati kita

Klik

MAYIT BAYI ?

Akeh restoran ing donya iki padha nyoba nyuguhake panganan kanthi cara kang aneh-aneh. Salah sijine kaya ing The Magic Restroom Cafe ing California iki. Restoran iki nyuguhake panganan kanthi tema “mangan mayit”. Senajan jabang bayi kang ana ing meja iki mung ethok-ethokan wae alias digawe saka pudhing. (d/ist)***

Pethilan

Ngrampungake kasus DPD kudu liwat jalur hukum

Sauger dudu hukum rimba

Mediasi Kraton Surakarta gagal

Ora usah dirujukake, rak kesel dhewe

Kursi DPRD Jatim, Jateng lan Jabar tambah

Taman Kanak-kanake saya rame…