Sapa Sejatine Gusti Yesus ?
Kiwa Bp FX Sukamto, Ketua Dewan Pastoral Paroki
Jamak lumrah menawa ndungkap pungkasan sasi Desember. Para umat Kristiani, salumah kurebe donya iki padha ribet. Padha samapta cecawis mangayubagya, mengeti wiyosan Dalem Gusti Yesus. Ora kurang Pangurus Dewan Pastoral Paroki, rong wulan sadurunge Natal, wis ndhapuk Panitia. Semono uga tumrap Seksi Sosial mligine. Nglumpukake sembako wigatine njangkepi kranjang Natal. Disumbangake tumrap para kaum miskin lan panti-panti Sosial. Ing kalangan kaum awam sok tuwuh patikonan. Sapa sejatine Gusti Yesus kang uga sinebut Kristus? Ing buku Injil miturut: Matius, Markus, Lukas lan Yohanes, ora tinemu tgl 25 Desember, minangka tgl. Wiyosan Gusti Yesus.
Mula ora nggumunake tumrap saperangan kaum awam. Dene tuwuh pitakonan kaya kasebut ing ndhuwur. Miturut catetan Injil nalika semana. Malaikat Gabriel ngatonake pribadine marang kenya Dewi Maria. Mratelakake menawa sang Dewi, bakal nggarbibi karana Hyang Roh Suci. Uga paring piweling ing tembe jabang bayi, sawise binabarake supaya tinengeran Yesus. Jeneng kasebut lumrah ing jaman Alkitab, tumrap putra sang kenya Dewi Maria. Sinebut uga pawongan Nazaret. Pratandha tuhu Gusti Yesus saka Nazaret (Mrk 10:45). Kawentar minangka Kristus utawa Yesus Kristus (Mat 16:16).
Tembung Kristus sajroning bahasa Indonesia, sumber asline saka tembung Yunani Khris-stos. Ing bab iki sajak madha rupa, saka bahasa Ibrani Ma-ahi’ach (Mesias). Tembung kekarone ndarbeni werdhi “Pribadi kang Diurapi” jarwan bebas bahasa Jawa, sang Jinebadan. Ujaring kandha istilah kasebut, jumbuh tumrap pawongan liya sadurunge Gusti Yesus. Umpamane Musa, Harun lan Raja Daud kang Jinebadan. Tegese winisudha ngemban tanggung jawab lan wewenang kang pinaringake dening Allah. Miturut pangandikane sawijining Rama, Yesus kuwi werdine: Sang Juru Selamat. Lan Gusti Yesus wis sepantese nampa sesebutan Kristus, Allah putra kang gesang (Mat. 16:16). Mengkono cuplikan penulis, saka “Menara Pengawal” 1 April 2010.
Nuwun. (Pak Yo)
